Qostanai.Media – ГЛАВНЫЙ ПОРТАЛ

Соңғы уақыттары Денисов ауданының жастары өнер-білім және спорт сайыстарында белсенділігімен көзге түсіп жүр.

Жуырда тағы бір қуанышты жаңалықтың куәсі болдық. Ауданның әзілқой жастары облыстық «Жайдарман» ойынының бас жүлдесін жеңіп алды.

Жақында облыстық сайыстың кезекті маусымы аяқталған еді. Сол додада ауданымыздың жастары ерекше шығармашылық тапқырлығымен көзге түсті. Денисов құрама командасы қазылар алқасының жоғары бағасына ие болып, «Super» лиганың Super чемпионы атанды. Жобаға әу баста 22 құрама қатысты. Әр кезең сайын үздіктер іріктеліп, финалда мықты 2 команда бас жүлдеге таласты. Қорытынды есепте Денисов жастарының бағы жанды.
Маусым қорытындысында:

1-орын және 500 000 теңге иегері – Денисов құрамасы, Денисов ауданы;

2-орын және 300 000 теңге иегері – QA, Қостанай гуманитарлық колледжі;

3-орын және 200 000 теңге иегері – Алтай құрамасы, Алтай қ. мен Позитив, А. Байтұрсынұлы атындағы Қосстанай өңірлік университеті атанды. «QA» командасының ойыншысы Балым Айбекқызы «Үздік ойыншы» атанып, 50 000 теңгелік ақшалай сыйақыға ие болды.
Облыстық Жайдарман тарихындағы 18-ші чемпион келесі жылы Чемпиондар лигасында өнер көрсетпек.

– Біздің команда 2024 жылдың қазан айынан бастап құрылды. Сол уақыттан бері Жітіқара, Денисов, Аманкелді аудандары мен Арқалық қаласында өткен Жайдарман, КВН ойындарына қатысып келеміз. Бақ сынап қана қоймай жүлделі орындарға да ие болдық. Биылғы Жайдарманда маусым бойы ойнап, чемпион атандық. Әзіл-сықақ сайысы тартысқа толы, қызықты өтті. Командалардың бәрі жоғары дайындықпен келіп, тамаша өнер көрсетті. Біздің ендігі мақсатымыз Астана қаласында болатын республикалық кезеңде Қостанай облысының намысын лайықты қорғау, – деді Денисов құрамасының капитаны Азамат Жолдықан.

Қымбат ДОСЖАНОВА

Суреттер «Жайдарман» ойыны ұйымдастырушыларынан алынды.