Qostanai.Media – ГЛАВНЫЙ ПОРТАЛ

18 желтоқсанда ауданымызда өткен мәдениет қызметкерлері арасындағы “Өнер арланы – 2024” қазақ күресінен облыстық турнирі өз мәресіне жетті.

Оған қос салмақ бойынша 18 өнерпаз палуан қатысты.

Турнирдің ашылу салтанатында қатысушыларды Сарыкөл ауданы әкімінің орынбасары Әлия Бекмағанбетова құттықтап, ұлттық спорт жанашыры Ертөре Дандыбаев ақ батасын берді.

Сонымен қатар, боз кілемде палуандарға төрелік еткен жоғарғы ұлттық дәрежедегі төреші Серік Дәрменбаев турнирдің ережесімен таныстырды.

Осылайша көптен күткен белдесу тартысқа толы өтті. 74 келіге дейінгі жеңіл салмақ дәрежесінде Жангелдин ауданынан келген өнерпаз Ұлан Топай 1 орынды (Өнер арланы белдігі, 150.000 теңге) жеңіп алды. Ал, сарыкөлдік Нағашыбай Ыбырай 2 орынды (100.000 теңге) еншілеп, амангелділік Нұрсұлтан Мұхтаров 3 орынға (80.000 теңге) ие болды.

Сонымен қатар, 74 келіден жоғары салмақ дәрежесі бойынша І орынды жангелдиндік Батырлан Қазым (Өнер арланы белдігі, 150.000 теңге) бағындырса, ІІ орынды лисаковтық Заманбек Берікқара (100.000 теңге) еншілеп, ал амангелділік Балтасар Ізтілеу (80.000 теңге) ІІІ орынды місе тұтты.

Айта кеткен жөн, жеңіске деген жігер үшін арнайы жүлде номинациясымен қостанайлық Төленді Әлғожин, ұзынкөлдік Асылбек Қабуәлиев және арқалықтық Қайрат Байділдиндер марапатталып, 50.000 теңгелік сертификатқа ие болды.

Марапаттау сәтінде Қостанай облыстық халық шығармашылығы орталығының басшысы Дәмер Қалқаев құттықтап, аудан әкімінің орынбасары Әлия Молдабайқызымен бірге марпат арды табыстады.

Жалпы, басқа өнерпаз палуандар қатысқандары үшін 20.000 теңгелік ынталандыру сертификаттарына ие болды.

Руслан ӘЛКЕЕВ
Суреттерді түсірген автор