Qostanai.Media – ГЛАВНЫЙ ПОРТАЛ

Жоба өз бастауын «Жайдарман» атты көңілді тапқырлар клубынан алады, мектеп жасындағы білім алушыларды КТК қозғалысына тарту мақсатымен  ұйымдастырылады.

Биылғы жылы «Дода» ойынына № 1 Ұзынкөл, Кәмшат Дөненбаева атындағы, Новопокров және Ершов, Обаған жалпы білім беретін мектептерінің «Аламан», «Барыс», «Крутые парни», «Азерол», «Звезды» командалары қатысты.

Бұл мезетте «Қостанай облысы әкімдігінің білім басқармасы» ММ қолдауымен 12 жасқа дейінгі балаларға арналған «Облыстық «DODA» дарынды және шығармашыл балалар лигасы» жобасы аясында Кәмшат Дөненбаева мектебінің акт залында Ұзынкөл ауданы оқушыларының іріктеу ойындары өтті. Додаға ауданның 5 мектебінің оқушылары қатысты.

– Командамыз «Барыс» деп аталады. Бірінші ойынға қатысқанымызда біз облысқа барғанбыз. Облыстық ойынның екінші іріктеу кезеңі  Сарыкөлде өтті. Жеңіспен оралдық. Тағы жеңіске жетеміз деп үміттеніп келіп отырмыз, балалар Қостанайда өтетін соңғы ойынға қатысуды мақсат етіп отыр– деді  Обаған жалпы білім беретін мектебінің тәрбие ісі жөніндегі орынбасары Бақыт Уразбекова.

Сайыс қорытындысы бойынша «Барыс» – Обаған ЖББМ құрамасы қыркүйекте өтетін «Шығыс» аймақтық іріктеу ойындарына жолдама алды.

Ойын ұйымдастырушысы Бәкір Марғұланды да әңгімеге тарттық.

– Мен, Бәкір Марғұлан «Жайдарлы жастар» қоғамдық қорының директорымын. Бұл байқау Қостанай облысының білім басқармасының мемлекеттік әлеуметтік тапсырыс төңірегінде өткізіліп жатыр. Бұл біздің авторлық жобамыз, ол 12 жасқа дейінгі білім алушыларға арналған. Қостанай облысының 20 өңірінде «Дода» байқауын өткіземіз, бұл ойындардан 1 жеңімпаздарды анықтап, сосын Солтүстік, Оңтүстік, Батыс және Шығыс  деп аталған 4 аймаққа бөліп, ойынды осы аймақтарда жалғастырамыз.

Ұзынкөл ауданы Меңдіқара, Сарыкөл, Қарасу, Алтынсарин аудандарымен бірге «Шығыс» аймағына кіреді. 5 ауданның жеңімпаздары қыркүйек айында Сарыкөл ауданында кездесіп жарысады. Финалға шыққан команда содан соң қазан айында Қостанай қаласында өтетін финалға қатысады. Осыдан үш жыл бұрын финалдың жеңімпаздары болды Жанкелді ауданының командасы, былтыр Лисаков командасы жеңімпаз аталды. Биыл, міне, үшінші ойын алдымызда тұр. «Дода» ойынының мақсаттарының бірі – балалардың сабақтан тыс уақыттарын қызықты ету, екіншіден, командалық сана-сезімді қалыптастыру, үшіншілен, креативті, логикалық ойлауды дамыту болып отыр деді.

Ойын бірнеше бөліктерден тұрды. Олардың ішінде зияткерлік сайыс, мобильдік ойындар сайысы, көңілді мәре деп аталған спорттық жарыс және «Өздерін таныстыру» тақырыбындағы «Жайдарман» сайысы ұйымдастырылды. Жарыс өте белсенді, қызықты өтті.

Бақытжамал ДАРКЕНОВА