Qostanai.Media – ГЛАВНЫЙ ПОРТАЛ

Биыл Қамысты ауданы бойынша иесі бар 143 итке чип салынды. Сонымен қатар, 16800 бас ірі қараға, 18 мың Қамбар ата түлігіне, 5 мың доңызға арнай белгі салынған. Бұл туралы Қамысты аудандық ветеринариялық станция басшысы Дулат Жұмабаев айтып берді.

Чиптеу – бұл бірегей 15 таңбалы нөмірі бар жануарлардың (иттердің, мысықтардың) микрочипін имплантациялау болып табылатын электрондық бірдейлендіру. Жануар және оның иесі туралы барлық ақпарат (бірегей код) «Pet Control» аудандық деректер қорына енгізіледі. Бағдарлама аудандағы жануарлардың есебін дұрыс жүргізу және жоғалып кеткен үй жануарының иелерін жедел іздестіру үшін қажет.

Бұдан басқа, чиптеу рәсімі үйсіз жануарлар санының өсуіне қарсы күрес жүргізудің ең тиімді шарасы. Қаңғыбас жануарлардың санына әсер ететін жайттардың қатарына иелерінің тарапынан болатын жауапсыздық, оларды бақылаусыз өсіру, азық базасын іздестіру мақсатында қаңғыбас жануарларды Қамысты ауданының аумағынан көшіру жатады.

-Жыл сайын иттер мен күшіктерге құтыруға қарсы вакцина салдырумен қатар жүргізіледі. Сонымен қатар, аслдандырумен айналысатын барлық ұйым жануарлары чиптеуге міндетті, – дейді Дулат Жұмабаев.

Енді үй иелері жануарларын тіркетпесе, 10 АЕК (29 170 теңге) көлемінде айыппұл төлеуіне тура келеді. Егер заң бұзушылық қайталанса, айыппұл көлемі жоғарылайды. Яғни, енді адамдар үйде асырап отырған жануарына заңды түрде жауапты болмақ.

«Біз қаңғыбас мысықтар мен иттерді бұрын үй жануарларына жатқызып келдік. Егер олар анықталып, тіркеуге алынса, онда, ертең үй жануарлары үйінен қашып немесе адасып қалып жатса, оларды оңай таба аламыз, Екінші жағынан, жануар санының тоқтаусыз өсіміне жол бермес үшін де бұл шара қажет», – дейді тұрғындар.

Еске салайық, ҚР 2021 жылғы 30 желтоқсандағы «Жануарларға жауапкершілікпен қарау туралы» Заңына сәйкес, республикада үй жануарларын чиптеу 2023 жылдың 1 қыркүйегінен бастап, міндетті.

Шұға ҚОҢҚАБАЙ