Qostanai.Media – ГЛАВНЫЙ ПОРТАЛ

Қостанай облысының әкімі Құмар Ақсақалов Арқалық қаласына жасаған жұмыс сапарында қаладағы бірнеше маңызды құрылыс жобаларының басталуымен танысты.

Әлеуметтік нысандар мен инфрақұрылымдық жұмыстарды дамыту бағытында бірқатар жобалар іске асырылмақ.
Сапар барысында Құмар Ақсақалов мектеп-интернаттың құрылысымен танысты. Бос тұрған ғимарат қайта қалпына келтіріліп, жаңа оқу орнына айналатын болады. Жоба құны 824,4 миллион теңге. Бұл жұмысты жергілікті «Дюссемстрой» ЖШС демеушілік көмек арқылы жүзеге асырады.
Сонымен қатар, «Дене тәрбиесі және спорт» саласын дамыту мақсатында жаңа мамандандырылған күрес залы салынады. Құрылыс жұмыстарының құны – 444,4 миллион теңге, мердігері – «Гранд Лидер Строй» ЖШС.

Бұрынғы «Қазақстан» кинотеатры ғимараты спорт орталығына айналады. Жоба құны – 449 миллион теңге. Ал ауыл шаруашылығы басқармасының ғимараты жөнделіп, Арқалық педагогикалық институтының оқу корпусына айналады. Бұл жоба 1 миллиард 926 миллион 700 мың теңгеге бағаланған.
Қалалық мәдениет сарайына да күрделі жөндеу жұмыстары жүргізілуде. Жобаның құны – 1 миллиард 217 миллион теңге, мердігері – «RAKADA GROUP» ЖШС.

Құмар Ақсақалов Арқалықтың инфрақұрылымын жаңарту жұмыстарын атап өтіп, жылумен жабдықтау мен сумен қамту жүйелеріндегі ақаулардың азайғанын айтты. Биыл қала тұрғындары жаңа асфальтталған жолмен Астанаға қатынайтын болады. Сондай-ақ, Ұлытау облысына дейін 87 шақырым жол салынып, қала аумағында сапалы жолдардың саны артады.

Арқалықтың көлік-логистикалық орталыққа айналуына байланысты әуеқозғалысын дамыту да жоспарлануда. Құмар Ақсақалов Астана мен Қостанайдан ұшатын рейстердің кестесін қарастыру мәселесі пысықталып жатқанын айтты.

Суреттерді түсірген – Бердіболат КӨРКЕМБАЕВ