Qostanai.Media – ГЛАВНЫЙ ПОРТАЛ

Науырзым ауданында алғаш рет Жамбыл жалпы білім беретін мектебінде «Жамбыл жұлдыздары шеруі» атты салтанатты іс-шара өтті.

Дарынды оқушылар мен үздік ұстаздарды ұлықтауға арналған кеш ерекше әсерге толы болды.

Шараға аудан әкімінің міндетін атқарушы Ержан Көкішев қатысып, білім, өнер және спорт саласында жоғары жетістікке жеткен оқушылар мен олардың жетекшілерін марапаттады. Өз сөзінде ол жастардың жетістігі – ел болашағының айқын көрінісі екенін атап өтіп, шәкірттерге сәттілік тіледі.

Мерекелік кеш барысында түрлі номинациялар бойынша үздіктер анықталып, алғыс хаттар мен арнайы марапаттар табысталды. Сонымен қатар мектеп оқушылары ән шырқап, би билеп, көрермендерге көтеріңкі көңіл-күй сыйлады.

Шараның басты мақсаты – оқу мен қоғамдық өмірде белсенділік танытып жүрген оқушылардың жетістігін дәріптеп, олардың бойындағы талантты қолдау. Бұл бастама шәкірттердің білімге деген құлшынысын арттырып, жаңа жетістіктерге жігерлендіре түсті.

– «Бүгінгі “Жамбыл жұлдыздары шеруі” – оқушылардың бір жыл бойғы еңбегінің жемісі. Әр баланың жетістігі – ұстаз үшін үлкен мақтаныш. Осындай тағылымды шаралар шәкірттердің ынтасын арттырып, болашаққа сенімін күшейтеді», – дейді Гүлзат Мырзабекова.

Осындай айтулы шарада жұлдыздар қатарынан көрінген оқушыларда өз қуаныштарымен бөлісті.

– «Мұндай кеште марапат алу – біз үшін үлкен қуаныш. Біздің жетістігімізді бағалап, қолдау білдірген ұстаздарымызға және ата-аналарымызға алғысымыз шексіз. Алдағы уақытта да биік белестерді бағындыруға тырысамыз», – деп бөлісті Айтбай Мұхамеджан.

Көпшіліктің ыстық ықыласына бөленген «Жамбыл жұлдыздары шеруі» алдағы уақытта дәстүрлі түрде жалғасын табады деген сенім мол.

Жібек МЫРЗАҒАЛИ
Суретті түсірген автор