Qostanai.Media – ГЛАВНЫЙ ПОРТАЛ

Мемлекет басшысының тапсырмасына сәйкес Торғай өңірінің әлеуметтік-экономикалық дамуы Үкіметтің ерекше бақылауына алынды.

Осы бағытта Қостанай облысының әкімдігі Арқалық қаласын, Амангелді және Жангелдин аудандарын қамтитын үш жылдық кешенді даму жоспарын бекітті. Жалпы құны 165,5 млрд теңгені құрайтын бұл жоспар 51 нақты іс-шарадан тұрады.

– Биыл Мемлекет басшысы Қазақстан халқына Жолдауында Торғай өңірінің әлеуметтік-экономикалық дамуы Үкіметтің назарында болуы тиіс екенін ерекше атап өтті. Осыған байланысты қазіргі уақытта Арқалық қаласын, Амангелді және Жангелдин аудандарын алдағы үш жылдық кезеңде әлеуметтік-экономикалық дамыту жөніндегі жоспар бекітілді. Ол жалпы сомасы 165,5 млрд теңге болатын 51 іс-шарадан тұрады. Құжат өңірді дамытудың басым салалық міндеттерін жедел шешуге бағытталған, – деді Құмар Ақсақалов Орталық коммуникациялар қызметіндегі баспасөз мәслихатында.

Аталған бастамалардың ішінде Арқалық қаласына айрықша басымдық беріліп отыр. Қалада стратегиялық маңызы бар инфрақұрылымдық жобалар жүзеге асуда. Соның ең ауқымдысы, Арқалық әуежайының құрылысы. Қазіргі таңда терминал ғимараты салынып, инженерлік желілер тартылған. Әуежайды 2026 жылдың шілде айында пайдалануға беру жоспарланып отыр. Бұл жоба қаланың көлік қолжетімділігін арттырып, экономикалық және инвестициялық тартымдылығын күшейтеді.

Сонымен қатар Арқалықты елдің негізгі өңірлерімен байланыстыратын көлік инфрақұрылымы жаңғыртылуда. «Жезқазған – Арқалық – Петропавл» автожолын жөндеу жұмыстары келесі жылы аяқталмақ. Ал биыл маусым айында құрылысы басталған «Орталық – Батыс» көлік дәлізі жол қашықтығын 549 шақырымға қысқартып, Арқалықтың транзиттік әлеуетін арттырады.

Шұға ҚОҢҚАБАЙ
Суретті түсірген – Бердіболат КӨРКЕМБАЕВ