Qostanai.Media – ГЛАВНЫЙ ПОРТАЛ

Жангелдин ауданында 2026 жылдың алғашқы алты айының әлеуметтік-экономикалық даму қорытындылары белгілі болды.

Өңірлік коммуникациялар қызметінде өткен брифингте аудан әкімі Дінмұханбет Бидашев аймақтағы атқарылған жұмыстар мен өзекті жоспарларды жария етті.

Аудан тұрғындарының тұрмыс сапасын арттыру мақсатында инфрақұрылымдық жобалар белсенді түрде жүзеге асырылып жатыр.

«Бүгінгі таңда аудан халқын тіршілік нәрімен қамту бойынша 12 елді мекен, яғни халықтың 88,6 пайызы орталықтандырылған су жүйесіне қосылған. Бұдан бөлек, үш елді мекен магистралдық су жүйесімен, ал 6 елді мекен су тарату қондырғыларымен қамтамасыз етілді», – деп атап өтті Дінмұханбет Бидашев.

Сондай-ақ шалғай елді мекендерді сапалы байланыспен қамту жұмыстары жүріп жатыр: Сарысу ауылына 4G интернет желісі тартылуда, ал Шилі, Милісай және Көлқамыс ауылдарында талшықты-оптикалық желілер жүргізіліп жатыр.

Білім беру мен спорт инфрақұрылымын жаңартуға да қомақты қаржы бағытталған.

«Мектептерді жөндеуге 88 миллион теңге қаралса, оқушылардың қауіпсіздігін қамтамасыз етуге — бейнебақылау орнату, дабыл түймелері мен полицияға тікелей қосу жүйелеріне 55 миллион теңге бөлінді», -деді аудан басшысы.

Бұдан бөлек, Шеген және Қаламқарасу ауылдарында жаңа шағын футбол алаңдары салынуда. Ал Тәуіш ауылында «Қазақстан халқына» қорының қолдауымен құны 152,2 млн теңге болатын заманауи модульді спорт залы бой көтеріп жатыр.

Қазіргі таңда ауданда 23 төсектік аурухана мен емхана халыққа қызмет көрсетуде. Дегенмен, медицина саласында түйткілді мәселелер де жоқ емес.

«Есепті кезеңде бізде кадр мәселесі бар: стоматолог пен хирург мамандарына тапшылық сезілуде. Дегенмен, медициналық инфрақұрылымды дамыту тоқтамайды. 2027-2028 жылдары Тәуіш, Көкалат және Ақшығанақ ауылдарында жаңа медициналық пункттер салуды жоспарлап отырмыз», – деп түйіндеді Дінмұханбет Серікұлы.

Шұға Қоңқабай,
Фото өңірлік коммуникациялар қызметінен алынды