Qostanai.Media – ГЛАВНЫЙ ПОРТАЛ

Қос ішектен күй төгілді

Амангелді ауданында облыстық «Қанатты домбыра» атты жас домбырашылардың байқауы өтті. Аталмыш байқау алғаш рет 2023 жылы ұйымдастырылған болатын. Жерлестеріміз Айназ Қарағұл бас жүлде, Орманбек Жанбота жүлделі бірінші орынды алған еді. Араға екі жыл уақыт салып, «Қанатты домбыра» байқауын қосымша білім беру ұйымдарының жылдық жоспарына енгізіп, енді аталған байқау дәстүрлі түрде жыл сайын білім беру ұйымдарының ұйымдастыруымен өтетін болады.

Амангелді ауданының білім бөлімі «Біртұтас тәрбие» бағдарламасының «Шабыт» жобасы аясында «Қанатты домбыра» жас домбырашылардың І облыстық байқауы жоғары дәрежеде өтті. Дәстүрлі қазақ музыкасын дамыту, өскелең ұрпақ пен жастар арасында ұлттық төл өнерді насихаттау мақсатында өткен байқауға Қостанай, Арқалық қаласы, Алтынсарин, Жангелдин, Әулиекөл, Науырзым, Амангелді, аудандарының өнерпаздары жас ерекшеліктеріне қарай 10-13 және 14-17 жас аралығында өнер көрсетті.

Амангелді ауданының әкімі Қанат Кеделбаев, білім бөлімінің басшысы Мұрат Дихамбаев шараға арнайы қатысып, жылы лебіздерін білдіріп, өнерпаздарға сәттілік тіледі.

Байқау барысында жас өнерпаздардың өнеріне «Дарын» мемлекеттік жастар сыйлығының лауреаты , Мәдениет саласының үздігі, композитор, ҚР Еңбек сіңірген қайраткері Анар Мұздаханова арнайы Астана қаласынан келіп баға берумен қатар, «Тархан баба» күйінің орындалуы бойынша жетекші ұстаздар мен оқушыларға шеберлік сағат өткізді.

Байқау ережесіне сәйкес үміткерлер Тобыл – Торғай өңірі күйшілерінің шығармалары бойынша өз шеберліктерін көрсетіп, жүлдегер оқушылар мен дайындаған ұстаздары Қостанай облыстық білім басқармасының мадақтамаларымен марапатталды.

Аталған байқауға Б. Хамзин атындағы өнер мектебінің төрт оқушысы қатысып, бақ сынады. 10-13 жас жас ерекшелігі бойынша Жанбота Орманбек бас жүлдеге ие болды. Жетекшісі Арайлым Әлібаева. Байқауда Н.Ахметбековтың «Июнь жарлығы», Қ.Әбіштің «Саржайлау» күйін асқан шеберлікпен орындады. Анар Айтбайқызыда марапат барысында Жанботаның шеберлігін ерекше атап өтіп, өнеріне жоғары баға берді. Кіші топтан өнер көрсеткен Тұрсынбек Қонарбай Анар Мұздаханованың дайындаған арнайы жүлдесін иеленді.

Қазақ руханиятына өлшеусіз үлес қосқан жерлес күйші –композиторлардың шығармашылық еңбектері насихатталған тағылымды шара қазақ халқының рухани мұрасын ұлықтап, күй өнерін жас ұрпаққа насихаттаудың жарқын үлгісі болды. Аталған байқаудың басқа байқаулардан ерекшелігі де осында.

Аягөз ФАЗЫЛБЕКҚЫЗЫ